كتبت الناشطة الاجتماعية ريف سليمان من خلال صفحتها رسالة مؤثرة تناشد فيها امهات لبنان وهن نصف المجتمع للثورة على ما آلت اليه حال اللبنانيين، جاء فيها:

“اليوم حابة ضوي ع موضوع زاعجني!

بهل بلد طب انه كهربا فهمنا ما في  وعادي منقدر نكمل بالليل ع ضو الشمعة منعتبر انه بنجامن فرنكلن و توماس أديسون و نيكولا تسلا ما نوجدو من الاساس و ما في اجمل من ضو الشمعة a la chandelle... 

بنزين فهمنا ما فيه كمان عادي منعتبر انه رودولف ديزل و هالترمان كارلس ما خلقو من الاساس و انه منرجع عالحمار و منستعمل بسيكلات و منمشي ع اجرينا و الله يسامحك يا كارل بانز و يا هنري فورد على هل عملة اختراع السيارة !

أمان فهمنا ما في من زمن و زمان و متكلين ع الله و منواسي بعض و انه ما حدا بموت ناقص عمره و الله لا يسامحك يا سياسي يا لبناني لوين وصلتنا و انه شعب من ايده عم يحصد شو زرع و مين انتخب و مين اصلا سكت و ما انتخب و اللي ما ثار و اللي رضي بالموجود الخ...

ماي ما في انه عادي ما نحنا ما عنا ولا بحر حدنا و لا نهر و لا شلال بيقطعوا من حدنا ...ما نحنا بلد ما عندو فصول يعني ما في شتا و تلج لحتى نعمل مشاريع و خطط نحافظ عل ماي و نعمل كهربا من الماي و هيك من زمان مش شي جديد انه صحرا و جمال و هيك ...

بالنسبة للمصاري و الدولار و هيك انه مشونا بضل عندكن عيل برا تمرقلكن دولارات و شغل برا يجيلك منه دولارات  و بنوك برا حاطين فيها مصاري و مدراء بنوك تمرقلكن بالوسايط و هيك ...اصلا نحنا أكبر من انه نحكي بالمصاري لأنه شعب  عينه شبعانة 

بالنسبة للاكل و السلع الغالية و القدرة الشرائية مش ضروري نكون carnivore هل فترة...ركّو عل خس و الجزر ما ياما آكلين هوا و ساكتين و شبعانين ...

مستشفيات و بنج و أدوية ما في انه عادي صار عنا مناعة و انه منرجع لطب الأعشاب و شوية حشيش منتبنج فيهم و كم حبة دوا اعصاب بتقطع و شوية سحر و شعوذة متل عل قديم بيقطعو ع كم اهبل او كم كلمة حلوة  و حضن بيداويك و هيك اصلا ما حدا بموت قبل ساعته ...

انه طعم كورونا ما قادر تحصل عليه و توصلّه عادي ما نحنا قوايا ولو شوية صلاة و ايمان بيقووك و بتزور شوية ائمة ع شوية قديسين و بتتبارك و بتدهن زيت زيتون و معلقة عسل و بتشرب زنجبيل و زهورات بتطيب...   

المهم السهر و الرقص و الفقش نحنا شعب منحب الحياة و مضيافين هيك بدنا الناس تاخد فكرة عنا...لا نستسلم 

كل هيدا لوصّلكن فكرة بشعة اليوم صارت معي...

كل هيدا مقبول قدام انه صرلي  من الصبح من صيدلية للتانية عم فتش ع حليب أطفال لعمر ٩ أشهر!!!

الولد اهله وضعن ع قدهم الأم ما قادرة ترضع و الولد بحاجة لحليب...جرّبولو حليب الكبار عم بموت الصبي...بدو حليب أطفال.. القصة مش مصاري القصة ما في...اذا لقيت ممكن ١ او ٢ بس يخلصو لارجع لاقي بلاقي نوع مختلف ما خصه بالتاني و لغير عمر....هيدول أطفال شو ذنبهم كرمال السياسة  و تجار العار و لك كيف الاهل ساكتين!

انتم يا أمهات ولك انتم اكتر من نصف المجتمع وينكن ولك اذا بتنزلوا ع الشارع بتقلبوا الشارع ! كيف راضيين ! 

يعني قديش محظوظين الاهل اليوم اللي عم بجيبو ولاد ع هل دني بلبنان و ما في حليب لولادهم بالسوق!

والله حرام و عيب! اللي قادر عم يوصي من برا لولادو بس هيك عم تسَكتوا اللي مش قادر حرام ظلم ...غير أنه الدولة عم تظلمكن انته يلي قادرين تامنو من برا لولادكم و بالوسايط عم تظلمه اللي مش قادرين و بالتالي أكبر حرام اللي عم بصير بحق خيك الانسان...دينك و كتابك و ربك ما بيرضى...الرجاء الرأفة و الرحمة و تحرّكوا...هيدول مستقبلكن”