علّق رئيس الحركة البيئيّة اللبنانيّة بول أبي راشد على كلام رئيس التيار الوطني الحرّ جبران باسيل من وجهة نظر بيئية قائلاً:

"التيار عم بيناضل ليبقى لبنان"

حابب أعرف عن اي لبنان عم تحكوا ؟ 

منطقة جنة نهر ابراهيم الطبيعية والأثرية كانت تعتبر الوادي المقدس عند الفنيقيين ومنه انتشر مفهوم الموت والقيامة وهو أغنى موقع طبيعي من ناحية النباتات والتنوع البيولوجي بلبنان بحسب تقرير الدكتورة ميرنا سمعان الهبر : دمرتوا مليوني متر مربع بصلابة وخالفتوا بمرونة قرار رفض المشروع من وزارة البيئة لان الموقع رح يفشل وما رح يكون اله إنتاج بتجميع المياه مثل باقي مواقع السدود اللي فشلت واللي تكلفنا عليها مئات ملايين الدولارات 

ساهمت بهدر الأموال العامة وبنهبها ...

وصورة سد بقعاتا-كفرحي المرفقة واضحة بالفشل بتجميع المياه لدرجة تحميل الخزينه كلفة اضافية وغير منطقية بتزفيت أرضية وادي بكاملو لان طبيعة الارض غير صالحة لتخزين المياه...

ايا لبنان رح يبقى؟ اذا رأس نهر الكلب اللي هو اهم موقع اثري بالمتوسط ويعتبر متحف فريد بالهواء الطلق بيلخص تاريخ ٣٣٠٠ سنة، قررتوا تبنوا مجمعكن الحزبي عليه وتحرموا لبنان من تصنيفه " تراث عالمي" من قبل اليونسكو...

شو صار بوادي نهر الجوز الأثري والسهل الزراعي بالمسيلحة ؟ 

شو صار ببساتين الفاكهة ببلعا ؟ 

شو كان رح يصير بمرج بسري الطبيعي والاثري والزراعي ؟ 

والأحلى من هيك رجعت ذكرت ببيانك اليوم استمراركن بخطة مشاريع السدود !!!

والمضحك المبكي هو قراركم بمكافحة الجرائم ضد البيئة : كيف مشي لوتو المرامل اثنين وخميس بال ٢٠١٧ ؟ مين مغطا المقالع بقضاء البترون مش لتسدوا بواليع سد بلعا؟ مش انتوا ضغطتوا على بلديات تنورين والعاقورا لتحويل الجرود لمقالع لنفس الهدف ؟  

خلص ما فيكن تقنعونا بقا انكن مش شركاء مع نفس المنظومة الفاسدة اللي سبقتكن على تدمير طبيعة لبنان وانتوا حطيتولن وزك ...

بعد باقي بلبنان الأرزات وأنهر ووديان ومواقع أثرية وجبال مكلله بالثلج هني صندوق لبنان السيادي. 

رح منناضل نحنا ليبقى لبنان ...

 وبصلابة وبلا مرونة مش رح نخلليكن تقضوا علين بحجة الإنتاج".